بعد صبح ع مصر بحنية .. ودخولنا لمرحلة الفكة
لسه طالع يشحت .. إبن الصرمة واكلها والعة
وأنا عاطل قاعد بَكّحت
البحر يحب الزيادة .. مصر دايماً ولادة
شبة الدولة بتصرف على رئيس خلفيته بيادة!
مركب وغرق .. منكرش إنتوا اللي عقرقتوه
لو مش بصورة مباشرة بإهمالكم إنتوا سبتوه
لاء ميهمش .. الموت ف البلد دي مش موعظة
حتى اسأل “مميش“
الماده الخام للهبل..
نصّبوه وعملوه هُبل
بيطلب فكة إبقى إدفعله
إدعي بس إنها تتقبل
الله يحنن عليك..
لاء يحنن عليك إيه!!
ده إحنا الأولى على شبه دولة
والرحمة متجوزش عليه
فاض بينا الكيل..
كنا دولة وأهل نيل
قبل ما يجي معتوه
يحللنا أكل لحم حمير
إدونا فرصة تانية الأولى باظت مننا
ستين سنة بتحكموا لحد ما بِعنا لحمنا
اللحم اللي بيتباع..
مش حمير ولا بتاع
ده لحم مواطنين شرفاء
بيبني #ثورة_جياع
بمناسبة الجوع..
اللحم دايماً مش موضوع
بجانب أزمة مفتعلة زي اللبن ياجربوع
مش أسف ولا أعذرني
مكسور دايماً إجبري
فكرة إنك رئيس
تخليني في موضع قُرني
ياجابر..
شيل الكفولة
هاتلنا القطفة الأولى
عنقودين عنب بناتي على كحك جيشنا العمولة
شفت القافلة اللي إحنا فيها
عدموا الحلواني اللي بانيها
سواء بحبال أو برصاص أو بضريبة مضافة عليها
علملوا ولادكم..
ده لو في فرصة للتعليم
قبل ما يجي الدور عليهم
في منظومة التعتيم
صارحهم بالحال..
متجملهمش الأحوال
خلوهم دايماً في الصورة
حتى لو كانت أهوال
قولهم يعبدوا ربهم
مش أشخاص زيهم
متخافوش..
على الله وعليك رزقهم
وقولهم..
القدس عاصمة فلسطين
ومصرية تيران وصنافير
والعروبة وهم خيال
درب من دروب الأساطير
……|
صوتي 