Posts Tagged ‘إحكيلي’


#إحكيلي | الحلقة الثالثة | الموسم الأول

🚩 لو عايز تعرف وتفهم إزاى بتتم صياغة مستقبل العالم؟

🚩 ولو مش مهتم وعايز تعرف بس وتفهم إستراتيجية إسرائيل وسلطتها اللى بتستخدمها ف السيطرة عامة و ع الوطن العربي بالتحديد؟!

🚩 وإستراتيجية الولايات المتحدة اللى إستعانت بها ف حروب الخليج ونجحت ف إستخدامها وسيطرت بها ع العالم كله؟

🚩 وسطوة وسيطرت العنصر الصيني والياباني والكوري ع الأسواق الخارجية ف كل مجالات التجارة؟

** لو عايزين تعرفوا كل ده .. تابعونا..

👋 (اهلاً بكم👋

سون تزو .. الإسم اللي صنع ثورات وثروات كتيرة لكل م قرا كتابة وإتبع إسلوبة وطبق مبادئه!

سون تزو .. ده كان مواطن وجندي ف الصين, الراجل ده سابلنا كتاب إسمه #فن_الحرب الكتاب يعتبر م أهم المخطوطات العسكرية القديمة ف تاريخ العالم كله.

“طيب”

– إيه سر أهمية وشهرة كتاب فن الحرب؟

إن سبب أهمية وشهرة كتاب فن الحرب .. المبادئ والمصطلحات اللى ذُكرت فيه بتّطبق لحد النهارده ف كل العالم .. رغم إن الكتاب من أكتر م 2000 سنة, وإن مش معنى إسم الكتاب فن الحرب إنه سياسي بحت ..لاء.. الكتاب ينفع طبقات كتيرة جداً وف مجالات مختلفة سواء كانت مجالات عسكرية أو سياسية أو إقتصادية .. ده بسبب المبادئ التكتكية والأفكار الفلسفية اللي جوه الكتاب .. وكمان الكتاب نجح ف حرب وسلم ومع مجتمعات منتجة ومستهلكة .. ولازم كل واحد عاقل يدرك اهمية الكتاب ده ويقراه لأنه مهم جداً بالنسبة لنا ع الأقل كمسلمين, حتى ف الوقت الحالي!

نرجع تاني لسون تزو ..

تزو .. كان بارع جداً ف فنون الحروب والقتال, بسبب الكتاب ده الملك عينة قائد ع الجيش, وبعد ما سون تزو قدر إنة يثبت كتابه فعلياً ع أرض الواقع ويكسب معارك كتير .. بجنود وقوات أقل م الخصم بأربع أضعاف أو أكتر م خلال مبادئ الكتاب؛ ملك تشي وقتها اللي هي الصين دلوقتي عينه قائد عام ع الجيوش, وبالمناسبة كتاب فن الحرب مكتوب باللغة الصينية القديمة, وللي ميعرفش اللغة الصينية القديمة كانت تكتب من أعلى إلي أسفل ومن اليمين للشمال عكس دلوقتي اللي بتكتب م الشمال لليمين وبشكل افقي, ولسوء حظنا الكتاب كان مكتوب ع سيقان نبات البامبو, ونبات البامبو من طبيعته إنه مبيستحملش عوامل الزمن والمناخ, ففي أجزاء م الكتاب إتأثرت وضاعت, واللي م خلالها رجح رأي الناس اللى بتقول إن في جمل ف الكتاب غير مترابطة مع بعض ويصعب فهما بسهولة, وناس تانية قالت إن بعض محبي سون تزو حطوا التاتش بتاعهم واضافوا للنسخة الأصلية م الكتاب, والكلام ده فتح باب للتشكيك ف حقيقة سون تزو ف الأصل وإنه شخصية خيالية مخترعة, اللى يهمنا هنا من كل ده الموجود ف الكتاب نفسة وإحنا نقرر.

كتاب فن الحرب كان ليه الفضل إن يحرر ويوحد شعوب كتير.. م ضمنهم اليابان, واليابان كانت المرحلة والخطوة الأولى لإنتقال وخروج الكتاب للعالم كله بعد كتابتة ف الصين, وبعد كده تمت ترجمتة كتاب فن الحرب للفرنسية والإنجليزية والألمانية, وف تأكيد لخبراء عسكريين كتير إن خلال الحرب العالمية الأولى لو كان إتوفر نسخة م الكتاب لقادة ومخططتين عسكرين ومتخذي القرار كان رحمهم م المذابح والمجازر والمغامرات الحربية الفاشلة والبشعة اللى حصلت ف الحرب العالمية التانية, وده عشان الكتاب بيقدم نسخة فريدة جداً ف طريقة التعامل مع السياسات التكتيكية لفنون القتال.

بمعنى .. إنه مش بيركز ع تحقيق النصر بس .. لاء .. وتجنب الهزيمة وتقليل وتفادي الخساير بأكبر قدر ممكن .. ويشرح كمان إزاي تحقق النصر م غير م تدخل المعركة أساساً .. وده بإختصار كان موقف شبيه جداً بفتح سيدنا عمرو بن العاص لمصر.

ف الفصل الأول م الكتاب بيتكلم ع وضع الخطط .. وهتلاقي حاجات شبيها جداً بالمهنج الرباني والحث ع الجهاد زي ما ذكر ربنا ف القرءان  وحضراتكم تحكموا, مثلاً بيقول تزو ف وضع الخطط:

إن فن الحرب له أهمية حيوية للدولة. وعندنا ماشاء الله أيات كاملة ف القرءان الكريم والحديث بتأكد الكلام ده ومتسبعدش إن الهوان والذل اللي إحنا فيه سببه ده.

تاني حاجة بيقول إن الحرب تعتبر مسألة حياة أو موت والطريق لبر الأمان أو للخراب وإنه موضوع يستحق ومينفعش نتجاهلة. تأكيد تاني م تزو وإحنا كمسلمين عندنا ماشاء الله حوالي 26 آية عن الجهاد و 38 آية عن القتال و 6 آيات عن النفير وودن م طين وودن م عجين.!

وطبعاً لو محاربتش هتتحارب وإن مفهوم السلم والسلام التام ما هو إلا إعتراف بالضعف والقبول بالذل والهوان تحت وطاءة أى مستعمر او إحتلال اى كان بقى المستعمر داخلي خارجي برباطوزي مش فارقة كله إحتلال.

تالت حاجة بيقول تزو إن فن الحرب بيقوم ع خمس عناصر ثابتة لازم القائد يكون مدرك لكل عامل وعنصر تماماً, والخمس عناصر هما :-

  • القانون الأخلاقي
  • السماء
  • الأرض
  • القائد
  • النظام العام

والقانون الأخلاقي يقصد بها الإنسجام بين الحاكم والمحكومي.

والسماء يقصد بها طبيعة المناخ والفصول الأربعة.

أما الأرض اللي هي المسافات سواء كانت طويلة او قصيرة أرض آمنة او أرض خطرة.

القائد بقى أكيد يقصد به أبوتريكة عشان متحبسش بس.

والنظام العام يقصد بها طريقة التنظيم والتحكم .. سياسياً بقى إقتصادياً أي كان.

..

أما الفصل التاني حكايته حكاية .. الفصل ده تقريباً تزو قرا المستقبل عن طريق الإستبصار وهو بيكتبه أو إن المواقف شبه ثابتة والتاريخ بيعيد نفسه.

ف بيقول إذا طال أمد حملتك العسكرية فموارد الدولة لن تواكب نزيف النفقات العسكرية! حد فاهم حاجة؟ وأحسنلك متفهمش!

وم ناحية تانية بيقولك إقتراب الجيش .. ويقصد بها تلاحمة مع العدو بيتسبب ف إرتفاع الأسعار الداخلية والكلام ده بيؤدي لإستنزاف ثروات الشعوب! واخدلي بالك إنتا.

ويرجع تاني يدوس ع جرحنا ويقول تزو افندي لما ثروات الشعوب بتقل وتخلص .. الشعب يعاني م الضرايب المفروضة عليه. وبعد م ثروات الشعب تقل وتخلص نخش ع التقيل بيقول إن بيوت الشعب هتبقى فاضية وتلت تربع دخلهم هيتبخر إلا إن نفقات الحكومة ع المعدادت العسكرية طيارات بقى ودبابات وهيشك بيشك وافراح هياخد الدخل العام كله.

واضح إن تزو دارس بره وجوه ..

انا بصراحة بعد م وصلت للمرحله دي قررت أقفل الحلقة مش عايز اعرف المستقبل أكتر م كده ورفقاً بحضراتكم وحاجات تانية “صورة كلابش او بوكس” .. أنصحكم بتكملة قراية الكتاب وابعد م جنبك اى آلة حاده .

📌 سلام و اشوفكم ف الحلقة الجاية ان شاء الله مع قصة جديدة .. ومتنساش لو عجبت القصة دوس لايك وسبسكرايب للقناة ولو حابب تشاركنا ف القناة بصناعة محتوى او ماده من مجهودك متبخلش ع نفسك بس حط تعليق او ابعتلنا رسالة ع ايميل القناة.

unewtv@gmail.com 📩

“بعض الناس لا يستطيعون الإيمان بأنفسهم إلا عندما يؤمن بهم الآخرون”

 

Advertisements

#إحكيلي | الحلقة الثانية | الموسم الأول

👋 (اهلاً بكم👋

* حلقتنا النهاردة عن شخصية خيالية حظت بإهتمام شديد من الناس .. حتى إن البعض أخد فكرتها كفلسفة حياة وتكملة لمفهوم وجودى! .. تابعونا

  • كتير منا أدمنوا حب شخصيات خيالية خارقة وأسطورية .. بداية بسوبر مان وشيرلوك هولموز ومروراً بأدهم صبري والزناتي خليفة وإنتهاء بإيرون مان وكابتن أمريكا .. وكتير منا كانوا بيحلموا وهما صغيرين أو قبل النضج .. بإن يكون عندهم قوة خارقة زي الناس دي .. بس بمرور الوقت إطورت الشخصيات الخارقة بسرعة .. وبعد م كانت شخصيات نستمتع ونتشجع بها .. إتحولت لشخصيات مقززة وبلطجية بتروج لأفكار شاذة وإنحرافات فكرية .. لو إنت إنسان عاقل كفاية هتسال نفسك شوية أسئلة ..
  • إية اللى يهمنى ويشدنى فى شخصية خيالية كاتبها إنسان طبيعى؟
  • إية اللى يخلى إنسان طبيعى إنه يتأثر بشخصية خيالية؟
  • إية اللى يخلى فلسفة شخصية خيالية مفهوم وجودى وفلسفة حياة معاصرة؟
  • إية هي الشخصية الخيالية التى تخليك تنحاز وتتحد مع الشر وتتقبل الشخصية دى حتى فى أبشع صورها؟
  • هل الشخصية الخيالية دى مؤثرة للدرجة حتى لاصحاب الادوار او الممثليين نفسهم؟
  • وليه متتوقفش عن متابعتها؟ ولا عشان إننا ضعاف وبنعشق الجانب المخيف اللى فينا حتى لو إنه مش متفق مع مظهرنا؟
  • ايه الدافع اللى عندك والمبرر اللي يخليك تحب شخصية خيالية لحد الإدمان؟ هل لإنها بتتمتع بالذكاء والحس الفكاهى؟ ولو كان ده مبررك .. اتمنى إنك توضح حبك لشخصية فى الواقع سادية؟

بعض  الاسئلة دى هنعرف اجابتها داخل الحلقة والبعض التانى إنتوا هتبقوا قادرين تجاوبوا علية بنفسكوا بعد ما تشوفوا الحلقة.

خلينا نركز ع شخصية واحدة ونحاول نحللها .. وأنا إخترت شخصية مؤثرة جداً ف أى مكان وأى زمان .. وتقريباً من ساعة ما ظهرت الشخصية دي  فى أول مرة  خلال عمل فنى لمجلة دى سى كومكس أشهر مجلات القصص المصورة فى أمريكا سنة 1940 إلى أخر عمل قام بيه الممثل الاسترالى هيث ليدجر سنة 2008 فى فيلم The Dark Knight .. ومازلت الشخصية دي بتحظى بنفس الإهتمام ونفس رونق ظهورها كل ما تتعرض ..  الجوكر .. الشخصية التي لا تنضب

كتير كتبوا مقالات عن الشخصية والفيلم وحللوها من جهة  فنية بحتة .. وكتير كمان كتبوا عن شخصيات الفيلم وحياتهم قبل وبعد عرض الفيلم, لكن اللى مش كتير حال الكاتب أمير زكى .. الكاتب أمير زكى كتب ف تدوينة بعنوان “التحليل النفسي والفلسفى لشخصية الجوكر” ودى كانت فى ديسمبر سنة 2009 واعتمد فى تحليلة لشخصية الجوكر زى ما تم عرضها فى الفيلم فقط .. على الإسلوب النفسى والفلسفى للشخصية عامة .. وده كان إتفاق لا إلتزام بالمفهوم .. وعن طريق تحليل كل كبيرة وصغيرة فى شخصية الجوكر .. حتى إنه كمان قام بتقسيم المقال لفقرات ووقفات رائعة من سيناريو الفيلم نفسة .. وبدأ بطرح الأسئلة وإجابتها وتحليلها تحليلين فلسفى ونفسى مثلاً زى:

  • الفقرة الأولى : عن الندوب اللى ف وش الجوكر جاتلة منين؟ اللى هيا الفسافيس والحاجات الغريبة اللى ف وشة .. وإن الجوكر حكى قصتين مختلفين تماماً عن بعض, عن سبب الندوب. 

 

🚩 المرة الأولى وهو بيحكى لجامبل (احد رؤساء العصابات) إن سبب الندوب دي هو ابو الجوكر .. ويقول الجوكر فى يوم إتخانق أبوه مع أمة بسكينة بالمناسبة ابو الجوكر كان خمورجى وشرانى .. وفى وسط الخناقة شاف الجوكر عابس الوجه متجهم .. بالبلدى الواد مخضوض فأبو الجوكر سابه م الحمار ومسك ف البردعة اللى هوا الجوكر .. وقالة خد ياض إنت وشك مش عاجبنى بتوحلوج فين إنت .. وقام عاملة ديزاين جديد بالسكينة فى بوقة. دى القصة الأولى.

🚩أما القصة التانية اللى حكاها الجوكر عن الندوب برده كانت لريتشيل وقالها إسمعي ياحاجة ريتيشل أنا متجوز واحدة جميلة بس عندها عيب إنها بتحب القمار وتحب تراهن وتلعب وتخسر وتستلف ومبتعرف تسد ديونها .. وبعد ده كله كانت بتتهمنى إنى مبضحكش وقالتلى وهي بتشاور بالسبابة والوسطى:إنت وشك يقطع الخميرة من البيت ياجوكر، مايينها وإضحك خللى ربنا يفكها عليه وعليك.. ف فايوم مقدرتش تسدد الديون اللى عليها .. فطبعاً الناس اللى كانت مديونلهم شوهوا وشها الجميل .. شوفتي ربنا عمل فيها إيه ياريتشيل عشان واطيه .. وعشان معناش فلوس ياريتيشل لعملية التجميل الولية إكتئبت وكانت هتعفن .. وجاتنى فكرة عشان اخفف عنها شوية م اللى هيا فيه .. واعبر لها عن إنى بحبها ومش التشوية ولا غيرة هوا اللى هيغير حبى ليها .. روحت مشوه وشى أنا كمان ورسمتلها أكبر إبتسامة علية .. تقوم الواطية يا ريتشيل تسيبنى وتهرب قال إية مش عجابها النيولوك الجديد اللى عاملتهولها.

  • ويقول نستنتج من القصتين ان الجوكر ربط بوعى او بغير وعى للألم اللى إتعرض له من الجرح اللى فى بوقة مع الآلام اللى اتعرض لها مع ابوه ومراته الواطية .. وإنه حط المواقف التلاتة على مستوى واحد ف الذاكرة .. ويضرب امير رأى خاص بجون جاك روسو بيقول فيه ” إن الذاكرة هى الفيصل فى تأثير الشعور بالألم لأن الإمتداد الزمنى الحاضر للألم الجسدى يكون ضيقاً للغاية” زي م إحنا حطينا بالظبط حكم مبارك والإخوان والسيسي ع مستوى واحد م الذاكرة!
  • نستنتج إن مشاعر الجوكر حول العالم كانت مزدوجة .. خصوصا الواد كان ورور وصغير وإتصدم مع أبوة وأمة .. وكونت ف شخصيتة الحب والكره .. الحب لأمة وكرهه لأبوة الخمورجى الشرير .. فكان قدام طريقين يبقى زى أمة لا حول لها ولا قوة ولا زى أبوة الشرير الوقح؟ إختار إنه يكون شرير زى أبوة .. بس بصورة أكثر إبداعية .. ومن هنا وقع الجوكر ف بئر الشر والرأى اللى بيقول إنة الجوكر مريض؟ ف دى كانت أنسب فرصة للإنتحار ويؤكد ع مرضة .. بس فضل إنة يضحى بالأخرين بواسطة الأخرين على إنة يضحى بنفسة “جدع ياباشا” وده يثبت إن الجوكر فيلسوف على نمط وجودى.

 

  • الفقرة تانية: عن الجوكر .. السيد وإن الجوكر إزاى بيلعب بالجدل الهيجلى بمنحنى مختلف ومنحرف وبيحاول يوصل للسيادة بكل الأساليب اللى إتكلم عنها هيجل فى كتاب (فينومينولوجيا الروح) فى فقرة جدل السيد والعبد .

 

  • الفقرة التالتة: عن إحتمالة قتل الجوكر لباتمان .. وإنه هل فعلا عايز يقتلة؟ يرجع تانى لجدل السيد والعبد بشكل أقوى وتحليل منطقى أعمق .. ويرد الجوكر بصفعة ف وش باتمان .. بحقيقة إن باتمان هوا اللى بيكمل الجوكر .. وإن الجوكر مش مجرم بالشكل التقليدى .. وده بإنه مش محتاج فلوس وبالتالى بيحرقها .. وإن مش محتاج يقتل باتمان .. لإنه بيكملة .. وقتلة هيرجعه مجرم عادى تقليدى بقى .. يقعد يسرق ف الترماى وإشارات المرور ويبقى زبلة .. وده بالفعل جدل السيد والعبد عند هيجل وهو تسيد السيد بداية إنحدارة. وده حصل وقريناه كلنا ف القرن العشرين مع شركة مايكروسوفت وشركة أبل.

 

  • الفقرة الرابعة:أمير يسألنا هل الجوكر فوضوى؟ ويستند ع حواره وذكره أكتر من مرة لكلمة الفوضى ده غير طبعاً إنها ظاهرة جداً ف تصرفاتة .

 

  • الفقرة الخامسة: “أخلاقهم.. عاداتهم.. إنها نكتة سخيفة.” وهنا الجوكر بيسخر من أخلاق وعادات المجتمع .. زى ما كان نيتشة بيثور على اخلاق وعادات مجتمعة وعصرة .. وده بان فى رد الجوكر على مدير البنك ف اللقطات الأولى من الفيلم.

ومش بيسخر من العادات وتقاليد مجتمعه الأخلاقية بس .. وبيوضح لهارفى دينت إن المجتمع قد إيه فاضى أخلاقياً ومش مهتم بمقتل المجرمين ورجال العصابات اكتر من إهتمامة بمقتل مسئول مشهور وده اللى حصل معانا ف مقتل النائب العام  وع أساس أساس إن المسؤلين ف الأصل رجال عصابات.

وكمان بيحاول الجوكر تشوية المجتمع وبالبلدى كده التريقة على المجتمع ورجاله .. بتشويه نفسة ولبسه لنفس البدل الرسمية بتاعتهم بس بالوان مضحكة بهلاونية .. ويلون نفسة بألوان مضحكة ومبالغ فيها .. وده للسخرية على عمليات التجميل المعنوية للمجتمع .. وقد ايه هوا متحضر ف الظاهر.

  • الفقرة السادسة: لماذا فشل الجوكر؟ ولماذا لم تحصل الكارثة؟ ويقصد أمير بفشل الجوكر برهانة مع باتمان لما قال له إن المجتمع المتحضر سيأكل بعضة ف اقرب وقت وإن الناس اللى بتدعي المثالية دي وبينادوا بيها هما اول ناس هيستغنوا عنها وهيكسروها لو جت ع مصالحهم الشخصية .. والمقصود بالكارثة انفجار العبارتين اللى محصلش مش بسبب إمتناع الناس ف العبارتين لاء .. ف البداية كل واحد دور على إنقاذ نفسه .. ووافق بتفجير غيرة .. إنما مكانوش شجعان كفاية! .. ويرجع تانى الجوكر وحيد لتأكيد فشلة ونقطة ضعفة الوحيدة.

ودى نهاية المقال الرائع للكاتب امير زكى. وتحليلة لحقيقة الجوكر النفسية والفلسفية من وجهة نظرة.

نرجع لهيث ليدجر والأثار الإيجابية والسلبية اللى ترتبت عليه بعد أداء دورة ف الفيلم…

  • الأثار الإيجابية: لاحظنا نجاح الممثل الاسترالى بإمتياز فى إظهار جنون الشر لشخصية الجوكر وإنتقالها لبعض الناس ف حياتهم الشخصية كأسلوب حياة زى ما قولنا .. واللى إستحق جايزة الاوسكار لأفضل ممثل مساعد للأسف بعد وفاته.

 

  • أما الآثار السلبية: واضح طباخ السم بيدوقه فعلاً .. وإن الدور زى ما نقله للناس بالصورة اللى احنا شفناها .. مكانش تقمص وتأدية دور فقط وعابر ..لاء .. نجح الجوكر فى إتمام رسالتة وتأثيرة حتى على مؤدى الشخصية .. ويقال إن الممثل هيث ليدجر لاقوه متوفى ف يناير 2008 بعد صدور الفيلم .. والناس كانت معتقدة ف الأول بإن ليدجر ميت بصورة طبيعية ومفيش دليل على إنتحار ومفيش دليل على وجود جريمة أساساً .. حتى إن فى نتيجة التشريح بتقول بإنه مات نتيجة جرعة زائدة م الحبوب المهدئة اللى كانت موصوفة ليه علشان تعالجة من مشاكل النوم المتقطع والإجهاد .. اللى يقال إن سبب الإجهاد دورة ف الفيلم.  ومفيش دليل كامل وكافى بيقول إنه إنتحر.

 

  • ف الأخر احب أقول إن أي حد بيتأثر بشخصية خيالية او شر معين كاتبها مؤلف او صنع لنفسه شخصية وهميه زي ابراهيم الأبيض وعبدة موتة والأسطورة وبيعتبره قدوة .. ده ف الأصل إنسان ضعيفة ووجوده ف حياتنا ضروري لإرتباطه بالتوازن البيئي.

 

📌 سلام و اشوفكم ف الحلقة الجاية ان شاء الله مع قصة جديدة .. ومتنساش لو عجبت القصة دوس لايك وسبسكرايب للقناة ولو حابب تشاركنا ف القناة بصناعة محتوى او ماده من مجهودك متبخلش ع نفسك بس حط تعليق او ابعتلنا رسالة ع ايميل القناة.

unewtv@gmail.com 📩

“بعض الناس لا يستطيعون الإيمان بأنفسهم إلا عندما يؤمن بهم الآخرون”

 

 


إحكيلي | الموسم الأول

👋 (اهلاً بكم👋

💬 ملحوظة : المقدمة عامية بحتة ولايجوز قراءتها إلا بنصف لسان .. أو أقل إن أمكن حتى وإن ظهر غير ذلك.

 ➊ دايماً أول تجربة جديدة أو أول مرحلة من مراحل تنفيذها بتكون قد إيه مُتعبة ومُجهدة .. لدرجة إن تعبها وإجهادها ممكن يخليك تعيد النظر أو تصرف نظر عن الفكرة كلها .. بس صدقنى أنا كنت واحد من الناس دى .. اللى (مبتعانيش = لا تعانى) من قلة الأفكار .. دايماً كنت ألاقى الفكرة بسهولة وكتير .. وأحط خطط أولية لتنفيذها وخطط بديلة .. وأطرحها على زمايلى وأصحابي .. نظرة الإنبهار اللى كنت بشوفها وبسمعها كانت تشبعنى وتكفينى .. ومن هنا تبدأ مرحلة الإنحدار وضعف العزيمة وقلة الإرادة .. وبالتالى كنت أستغنى عنها بسهولة.

 ➊ حاولت أفسر الحالة دى مع كل فكرة جاتنى .. وأسأل نفسي: إيه الفايدة من إن أدور وأتعِب نفسي على فكرة لمّا فى النهاية هيكون مصيرها “شد السيفون” ؟! .. وبدأت مرحلة قِلة الأفكار .. اللى مع الوقت بقت نادرة .. ومش بس وكده .. دى أظهرت فى شخصيتى آثار سلبية كمان.

🚩ممكن حضراتكم تقولوا إختصر وقولنا عايز إيه .. أقولكم لو بصينا بأثر رجعى لأخر 5 سنين على الأقل .. ولاحظنا قد إية الظروف وسطحية مجتمعنا خدمت قِلة من الناس .. وإقتناع بعض الناس على إنطاقة القدرإتفتحتلهم .. وتصنيفهم مننا على إنهم عامة أو أنصاف عقول أو أصحاب مهارات محدودة .. دى حاجات (معابتهمش = لا تعُيبهم) أكتر من إنهم عابونا بوجودهم .. وإنهم بيتكلموا على لسانا وعلى إعتبار إن ده رأى الأغلبية وده مستوى تفكيرهم .. عندهم حق الأغلبية ساكتة وأصحاب العقولمأنتخين“.

🚩ببساطة وبدون ما أطول على حضارتكم وبإختصار شديد جداً .. الشمس زى ما بتطلع على الفاسد بتطلع على الصالح وبتطلع على الكافر وبتطلع على المؤمنوالهوا والرزق كمان .. الفكرة إن إزاى كل واحد بيستخدم الحاجة اللى عندة .. ومن هنا نبدأ  .. دى كانت مقدمة ممله بعض الشيء .. وقبل ما ابدأ  أول حلقات #برنامج_إحكيلى طبعا لازم أفهم حضارتكم شوية حاجات:

 البرنامج عبارة عن قص للقصص الحقيقية المؤثرة جدا ف حياتنا سواء قصص تاريخية أو دينية أو أىٍ كان نوعها .. شرطها الأول والأخير إنها مفيدة وحقيقية 100%  (كاعائد الإستثمار الأجنبى والناتج القومى ودخل قناة السويس تو).

 إحكيلى مش مجرد واحد محضر قصة وطالع يحكيها للناس بنسق وإسلوب تقليدى ممل م اللى إتعودنا عليه .. لالاء .. ممكن اى حد يحضر القصة ومراجعها الحقيقية .. ويطلع هو يحكيها للناس بإسلوبة. (وأمشى أنا ورزقى ورزقك على الله).

 ده الأهم الهدف م إحكيلى؟ الهدف م إحكيلى ممكن يوفر عليك وقتك ومجهودك ف قراية كتاب أومقال أو رواية حقيقية (مش تاخد خازوق ف شراء شوية كتب وروايات وتكتشف بعد كده بإن كاتبها مبيعرفش يفك الخط) .. وهنعمل كده عن طريق تلخيص الكتب أو الراويات أو غيرها ف أعمدة رئيسية خصوصا لو إنت مش بتحب القراية أو بتمل منها أو أى سبب بيمنعك من متعة المعرفة وأهميتها .. وده طبعا بمشاركته مع الناس وبالتالى بيفتح مجال وباب ملوش نهاية مع كل واحد فينا .. بمعنى أنا قريت قصة أو كتاب عجبنى وحابب أنصح بيه الناس فبشارك أهم ما فيه بصوتى ..  زى ما بعمل دلوقتى .. وإنت أو غيرك ممكن يعملوا  كده بعدين.

💡 قبل ما أبدأ تصوير .. بعت لناس اصحابى للمشاركة معايه .. وكان رد اغلب الناس: “أنا معنديش حاجة أقدمها ولا أقولها” .. دى كانت النقطة السلبية .. كل واحد منا مستنى حد يُملى عليه او يقوله إعمل ده وسيب ده .. فين إنت ونفسك من كل ده؟! عيب تفضل حياتك كلها تحلم بزعيم يقودك ومتحلمش مره واحده بإن يكون إنت الزعيم.

👥 صدقونى ياجماعة الموضوع بعيد كل البعد عن الإيجابية .. ومش دعوة لجعل العالم أفضل ولا الشعارات دى .. ولو فشلنا مش هنحرق العالم أكتر م اللى هو فيه .. الموضوع أبسط والهدف منه تنشيط وتحفيز  الدماغ لمواصلة حياتنا المملة والراكدة .. وخلق فرصة لتنشيط الجانب الإيجابى على الأقل .. وصدقنى تانى هتصعب عليك نفسك وتحس بالوجع أكتر لما تلاقى الدنيا بتلفظ أبشع ما فيها زى (موسى وبكرى وعكاشة والخليل) وكل الرقصات اللى بيجوا من بره مصر ينجحوا .. وإنت وانا اللى عايشين فيها مش عارفين ناخد خطوة!

تيمناً بتجديد الشافعى .. وإقتداء بإجتهاد عمر حاول معايا .. و”ماتديش” ضهرك للترعة و”ماتمشيش” جنب الحيط قبل ما ينتهى بيك الحال بتقرير جميل ولا ريبورتاج معفن بصوت مراسلة حقيرة مصحوب بموسيقة فيلم المواطن المصرى على قناة عمرك ما كنت تتخيل إنك تطلع عليها حى .. بس طلعت عليها ميت بخبر إنتحارك.

 

📌 سلام ونتقابل ف الحلقة الأولى م برنامج إحكيلى .. مستنى دعم ومشاركة حضارتكم وتعليقاتكم الإيجابية ورسائلكم .. وزى م قولت قبل كده لو حابب تشاركنا ف القناة .. بصناعة محتوى أو ماده من مجهودك متبخلش ع نفسك وإخلق لنفسك فرصة .. بس حُط تعليق أو إبعتلنا رسالة ع ايميل القناة.

“بعض الناس لا يستطيعون الإيمان بأنفسهم إلا عندما يؤمن بهم الآخرون”

 

unewtv@gmail.com 📩